ടെന്‍ഷന്‍ കുറയ്ക്കണോ? ഒരു നിമിഷം...

എന്റെ ജ്യേഷ്ഠന്‍ മുഖേനയാണ് ഞാന്‍ യോഗയെപ്പറ്റി കേള്‍ക്കുന്നത്. ജ്യേഷ്ഠന്റെ ശ്വാസസംബന്ധമായ ചില പ്രശ്‌നങ്ങള്‍ക്ക് പ്രതിവിധിയായി ഏതോ ഒരു ഡോക്ടര്‍ യോഗ നിര്‍ദ്ദേശിക്കാനിടയായി. ജ്യേഷ്ഠന്‍ പതിവായി ക്ലാസുകള്‍ക്ക് പോവുകയും ചെയ്തു. ക്ലാസ് കഴിഞ്ഞുവരുന്ന ജ്യേഷ്ഠന് അല്പം പ്രസരിപ്പും മുഖത്തൊരു തെളിച്ചവും ഉള്ളതായി ശ്രദ്ധിച്ചെങ്കിലും അതൊന്നും ഗൗനിച്ചില്ല. 

അപ്പോള്‍, 'നിനക്കും പോയിനോക്കിക്കൂടേ' എന്ന് അമ്മ ഉപദേശിക്കാന്‍ തുടങ്ങി. ആളുകളുടെ ഇടയില്‍ പോയി എക്‌സര്‍സൈസൊക്കെ ചെയ്യാന്‍ പണ്ടേ എനിക്ക് മടിയാണ്. പിന്നല്ലേ യോഗ... ഞാന്‍ സമ്മതിച്ചില്ല... 

നാളുകള്‍ കടന്നുപോയി. ഒരുദിവസം ജ്യേഷ്ഠന് കോഴ്‌സിന്റെ ഭാഗമായി ലഭിച്ച യോഗയെപ്പറ്റിയുള്ള പുസ്തകം മറിച്ചുനോക്കാന്‍ ഇടയായി. ഞാന്‍ തേടി നടന്നത് ഇതുതന്നെയെന്ന് എനിക്ക് മനസ്സിലായി. പിന്നെ അമാന്തിച്ചില്ല, അടുത്ത ദിവസം തന്നെ കോഴ്‌സിന് ചേരാനായി പുറപ്പെട്ടു. 

മധുരമായി സംസാരിക്കുന്ന വിജയരാഘവന്‍ മാസ്റ്ററായിരുന്നു ഗുരു. ഗുരുവിന്റെ വാക്കുകളില്‍ നിന്നും യോഗ എന്താണെന്നും അതിന്റെ പ്രയോജനവും, ആരോഗ്യത്തോടെയുള്ള ജീവിതരീതിക്ക് അനുവര്‍ത്തിക്കേണ്ട ഭക്ഷണക്രമത്തെപ്പറ്റിയും എല്ലാം മനസ്സിലാക്കി. ജീവിതത്തിലെ ഒരു വഴിത്തിരിവുതന്നെയായിരുന്നു അത്. 
യോഗ ഒരു വ്യായാമമല്ല. ഒരു ജീവിതരീതി ആണ്. വ്യായാമങ്ങള്‍ നമ്മുടെ ശരീരത്തിന് മാത്രം പ്രയോജനപ്പെടുമ്പോള്‍ യോഗ ശരീരത്തിനും മനസ്സിനും ഒരു പോലെ പ്രയോജനപ്രദമാണ്. തിരക്കുപിടിച്ച ജീവിതത്തില്‍ പലപ്പോഴും യോഗപരിശീലനം തടസ്സപ്പെടുമെങ്കിലും ടെന്‍ഷന്‍ വര്‍ദ്ധിക്കുമെന്ന് തോന്നുമ്പോള്‍ ഞാന്‍ ഓടും യോഗ ചെയ്യാന്‍.

യോഗയുടെ പ്രയോജനങ്ങള്‍

യോഗ ചെയ്താല്‍ മെലിയുമെന്ന് പലരും പറഞ്ഞുകേള്‍ക്കാറുണ്ട്. യഥാര്‍ത്ഥത്തില്‍ സംഭവിക്കുന്നത് ശരീരത്തിലെ അമിത മേദസ്സ് നഷ്ടപ്പെടുന്നതാണ്. അതോടെ ശരീരത്തിന് നല്ല Flexibility ലഭിക്കുന്നു. Energy യുടെ ഭാഷയില്‍ പറഞ്ഞാല്‍ Pranic Energy യുടെ അളവു വര്‍ദ്ധിക്കുന്നു. എല്ലാ മനുഷ്യ ശരീരത്തേയും ആവരണം ചെയ്യുന്ന ഓറയുടെ അളവില്‍ കാര്യമായ മാറ്റമുണ്ടാകുന്നു. നേരത്തെ പറഞ്ഞ മുഖപ്രസാദത്തിന്റെ കാരണം ഇതാണ്. 

എത്ര വയസ്സുമുതല്‍ യോഗ ചെയ്യാം?

13 വയസ്സിന് താഴെ പ്രായമുള്ളവര്‍ യോഗ ചെയ്യുന്നത് നല്ലതല്ല. മസിലുകള്‍ ഉറയ്ക്കുന്നതിനുമുമ്പുള്ള ഇളം പ്രായത്തില്‍ യോഗ ചെയ്യുന്നത് എളുപ്പമെങ്കിലും പിന്നീട് അത് വലിയ ദോഷം ചെയ്യാനിടയുണ്ട്. ലഘുവ്യായാമങ്ങളായ സൂക്ഷ്മയോഗ ചെയ്യുന്നത്‌കൊണ്ട് കുഴപ്പമില്ല. പഠിക്കുന്ന കുട്ടികള്‍ക്ക് തലച്ചോറില്‍ രക്തചംക്രമണം വര്‍ദ്ധിക്കാനും ബുദ്ധി സൂക്ഷ്മമാവാനും സഹായിക്കും.

ആസ്ത്മ, അലര്‍ജി, നടുവേദന

ശ്വാസകോശത്തെ വികസിപ്പിക്കാനും ശുദ്ധവായു അകത്ത് പ്രവേശിക്കാനും സഹായിക്കുന്നതാണ് ശ്വസനക്രിയകള്‍. സ്ത്രീകളെ അലട്ടുന്ന പ്രശ്‌നമാണ് നടുവേദന. ഇടുപ്പിനും നട്ടെല്ലിനും വ്യായാമം ലഭിക്കുന്ന ആസനങ്ങള്‍ നടുവേദന കുറയ്ക്കും.

സൗന്ദര്യം കൂട്ടാന്‍

സൗന്ദര്യം കൂട്ടാനും യോഗയോ? അദ്ഭുതപ്പെടേണ്ട. പ്രസവശേഷം അരക്കെട്ടിലും വയറിലും അടിഞ്ഞുകൂടുന്ന കൊഴുപ്പുകള്‍ കുറയ്ക്കാന്‍ യോഗ സഹായിക്കും. 

നല്ല സമയം ഏത്?

പുലര്‍ച്ചെ എഴുന്നേറ്റ് യോഗ ചെയ്യുന്നതാണ് നല്ലത്. വൈകുന്നേരമാണെങ്കില്‍ 4 മുതല്‍ 7 വരെയുള്ള സമയത്തിനിടയ്്ക്ക് ചെയ്യാം. കുറഞ്ഞത് ഒരു മണിക്കൂറെങ്കിലും ചെയ്യാന്‍ ശ്രദ്ധിക്കുക. കഴിയുന്നതും മുടങ്ങാതെ ചെയ്യാന്‍ ശ്രദ്ധിക്കുക.

ശരിയായ സ്ഥലം ഏത്?

ഹഠയോഗ ശാസ്ത്രത്തില്‍ പറയുന്നത്, ആള്‍പ്പെരുമാറ്റമില്ലാത്ത ഇടം, ശാന്തമായ അന്തരീക്ഷം എന്നൊക്കെയാണ്. തുറന്ന സ്ഥലം ഒഴിവാക്കുക.
കുട്ടികളും മറ്റും ശല്യപ്പെടുത്താത്തവിധം, ആര്‍ക്കും അധികമായി കടന്നുവരേണ്ടതില്ലാത്ത, നല്ല വായുസഞ്ചാരമുള്ള ഒരു മുറി തിരഞ്ഞെടുക്കുകയാണ് നല്ലത്. 

ആഹാരം

മാംസം കഴിയുന്നതും കുറയ്ക്കുക. സെമി വെജിറ്റേറിയനാവുന്നതാണ് നല്ലത്.
ഗുരു പറയാറുള്ളത്, 'നിങ്ങള്‍ എന്തും കഴിച്ചോളൂ. പക്ഷേ യോഗ സ്ഥിരമായി ചെയ്യുമ്പോള്‍ നിങ്ങളുടെ ശരീരം തന്നെ വിരുദ്ധാഹാരങ്ങളോട് അകന്നു നില്‍്ക്കും' എന്നതാണ്.


ഒരു ഗുരുവിന്റെ സഹായത്തോടെ മാത്രമേ യോഗ അഭ്യസിക്കാവൂ. പുസ്തകം വായിച്ച് യോഗ അഭ്യസിക്കരുതെന്ന് സാരം. പഠിച്ചുകഴിഞ്ഞാല്‍ പിന്നെ സ്വന്തമായി വീട്ടിലിരുന്ന് പരിശീലിക്കാം.


തെറ്റായ ഭക്ഷണക്രമങ്ങള്‍ കൊണ്ടൊക്കെ മലിനമായ ശരീരത്തില്‍ രോഗങ്ങള്‍ വന്നശേഷം, ഒരുപാട് വിലപിടിച്ച മരുന്നുകള്‍ കഴിച്ച്, അതിന്റെ Side effect മൂലം വീണ്ടും രോഗങ്ങള്‍ വന്ന് അതിനെ നേരിടാന്‍ വീണ്ടും മരുന്ന് കഴിക്കുന്നവരാണ് നമ്മള്‍. യാതൊരു ചെലവും ഇല്ലാത്ത യോഗപരിശീലനം കൊണ്ട് ഒരുപാട് രോഗങ്ങള്‍ വരാതെ നോക്കാനും വന്നുകഴിഞ്ഞാല്‍ സുഖപ്പെടുത്താനും കഴിയും.


അപ്പോള്‍. യോഗയെക്കുറിച്ചൊക്കെ ഒന്നു മനസ്സിലാക്കാന്‍ ഇന്നുതന്നെ തീരുമാനമെടുത്തോളൂ....